కేదార్నాథ్ యాత్ర విశేషాలు

కేదార్నాథ్ క్షేత్రం భౌగోళిక పరంగా ఉత్తరాఖండ్ రాష్ట్రం లో రుద్రప్రయాగ్ జిల్లాలో సముద్రమట్టానికి 3584 మీటర్ల ఎత్తులో, మందాకినీ నది పై భాగంలో, గర్వాల్ కొండల్లో మంచు కొండలమధ్యలో ఉంది . యిది 12 జ్యోతిర్లింగాలలో 11 వ జ్యోతిర్లింగం. ఇక్కడ పరమశివుడు కేదారీశ్వరుడిగా స్వయంభువుగా వెలిశాడు.

క్షేత్ర మాహాత్మ్యం :

నేడు కేదార్నాథ్ బదరీనాథ్ గా పిలవబడే కేదారఖండం అనబడే హిమాలయ పర్వత ప్రాంతంలో నరనారాయణులు అనేక వేల సంవత్సరాలు పార్థివ లింగానికి అర్చన చేశారు. వారి తపస్సుకి మెచ్చిన శివుడు వరం కోరుకోమని అడుగగా కేదార్నాథ్ లో స్వామిని స్వయంభువుగా వెలిసి భక్తులని కాపాడమని కోరారు. సంతోషంతో శివుడు అక్కడ స్వయంభువుగా వెలిసాడు . కొన్ని యుగాలు గడిచిపోయాయి స్వామి లింగం కాలక్రమేణా క్షీణించిపోయింది . ద్వాపరయుగాంతంలో పాండవులు ఐదుగురు స్వామి దర్శనానికి వెళ్లారు, అప్పుడు స్వామి వారు పాండవుల భక్తిని పరీక్షింపదలచి ఒక మహిషం అంటే దున్నపోతు గా మారారు . ఆ దున్నపోతు అక్కడ పాండవుల ముందుకు వచ్చి అంతలోనే ఉరకడం మొదలుపెట్టింది, అంతటి హిమాలయాల్లో ఒక దున్నపోతు ఉండడం చూసి ఒక్కసారిగా ఆశ్చర్యపోయి ఖచ్చితంగా అది పరమశివుడే అని, ఎలాగైనా పరమశివుని స్పర్శించాలని ఆయన పాదాలు పట్టుకోవాలని ఆ దున్నపోతు వెంట పరుగు తీస్తు అందుకోవడానికి ప్రయత్నించగా , చివరికి దున్నపోతు తోక అందిపుచ్చుకోగలిగారు . వెంటనే తోక తో సహా దున్నపోతు పృష్ఠ భాగం అనగా వీపు భాగం వారి చేతుల్లో వచ్చి పడింది , దున్నపోతు రూపం లో ఉన్న శివుడు వారిని అనుగ్రహించి మాయమైపోయాడు . ఆ వీపు భాగం పడిన చోట శిలా రూపం గా మారి శివ స్వరూపంగా భక్తులకు దర్శనం ఇస్తున్నాడు ఆ పరమేశ్వరుడు .

కేదార్నాథ్ దర్శనానికి అనువైన సమయం :

విపరీతమైన మంచు కురవటం వల్ల ప్రతి సంవత్సరం 6 - 7నెలలు మే నుండి దీపావళి (నవంబర్ ) వరకు మాత్రమే గుడి తెరుస్తారు, దీపావళి వెళ్లిన రెండో రోజు పూజ నిర్వహించి గుడి తలుపులు మూసేస్తారు . మిగిలిన 5 నెలలు మంచులో కప్పబడి ఉంటుంది.

తలుపులు మూసే రోజు ఆలయంలో వెలిగించిన దీపం మరియు పూజ చేసిన పువ్వులు , 5 నెలల తర్వాత తెరిచిన రోజు అదే విధంగా ఉండటం విశేషం . మిగిలిన 5 నెలలు దేవతలు పూజిస్తారని భక్తుల నమ్మకం .

మే నెల అన్ని విధాలా చార్ ధామ్ యాత్రకు అనువైన సమయం కాకపోతే మే నెల చివరికొచ్చేసరికి భక్తుల రద్దీ చాలా ఎక్కువగా ఉంటుంది, జూన్, జులై, ఆగష్టు నెలల్లో వానలవల్ల కొండచరియలు విరిగిపడే ప్రమాదం చాల ఎక్కువగా ఉంటుంది కనుక ఆ సమయంలో వెళ్లకపోవడమే మంచిది . ఒకవేళ చలికి తట్టుకోగలమా అనుకుంటే సెప్టెంబర్ నుండి నవంబర్ వరకు మంచి అనువైన సమయం . రద్దీ ఎక్కువగా ఉంటుంది రూమ్ అద్దెలు , గుర్రం లేదా డోలి అద్దె కూడా మే నెల లో సెప్టెంబర్ తో పోలిస్తే ఎక్కువగా ఉంటాయి . కానీ సెప్టెంబర్ నుండి నవంబర్ వరకు ఉష్ణోగ్రతలు మైనస్ డిగ్రీల్లో ఉంటాయి. అది తట్టుకోగలము అనుకుంటే సెప్టెంబర్ నుండి నవంబర్ మధ్య చార్ధామ్ యాత్ర ని చేయవచ్చు .

ఉత్తరాఖండ్ లోని చార్ ధామ్ యాత్ర గా పిలువబడే కేదార్నాథ్, బద్రీనాథ్, గంగోత్రి , యమునోత్రి తో పాటుగా హేమకుండ్ సాహిబ్ కి కలిపి చార్ధామ్ యాత్ర రిజిస్ట్రేషన్ ఏప్రిల్ - మే నెలల్లో website ద్వారా రిజిస్ట్రేషన్ చేసుకోవాలి. website లింక్ : https://registrationandtouristcare.uk.gov.in/signin.php

పైన ఇచ్చిన లింక్ ద్వారా మనం ఉత్తరాఖండ్ రాష్ట్రం లోకి enter అయ్యే date , అదే విధంగా రాష్ట్రాన్ని నుండి వచ్చేసే date యివ్వాలి అదే విధంగా కేదార్నాథ్ వెళ్లే తేదీ, ఒకవేళ బద్రీనాథ్ మరియు మిగిలిన రెండు ప్రదేశాలు కూడా వెళ్లాలనుకుంటే ఆ తేదీలు కూడా ఇవ్వాలి . అదే ఒక గ్రూప్ గా వెళ్లాలనుకుంటే మీ బృందం లోని సభ్యులందరి పేర్లు ఆధార్ నెంబర్ మొదలైన వివరాలన్నీ ముందుగానే రెడీ గా ఉంచుకుని upload చేయాలి, అదే విధంగా సొంత vehicle లో వెళ్తున్నారా లేక hired వెహికల్ నా అనేది ఎంచుకోవాలి . తిరుమల దర్సనం బుకింగ్స్ లాగానే చార్ధామ్ యాత్ర రిజిస్ట్రేషన్ కూడా open అయిన కొద్దీ నిమిషాల్లోనే bookings పూర్తయిపోతాయి కనుక చాల అలెర్ట్ గా ఉండాలి . బుకింగ్ పూర్తయ్యాక డాక్యుమెంట్ ని డౌన్లోడ్ చేసి ప్రింట్ తీసుకోవాలి .

కేదార్నాథ్ యాత్ర కు వెళ్లాలంటే ఢిల్లీ వరకు లేదా డెహ్రాడూన్ వరకు ట్రైన్ లేదా ఫ్లైట్ సదుపాయం కలదు . తెలంగాణ మరియు ఆంధ్ర నుండి ముఖ్యమైన అన్ని పట్టణాలనుండి ఢిల్లీ లేదా డెహ్రాడూన్ వరకు ట్రైన్ సదుపాయం ఉంది, అక్కడ లోకల్ లో ముఖ్యమైన ప్రదేశాలు చూసుకుని హరిద్వార్ లేదా రిషికేష్ వరకు ట్రైన్ కి వెళ్ళవచ్చు లేదా బస్సు, క్యాబ్స్ అందుబాటులో ఉంటాయి.

ఖమ్మం నుండి న్యూ ఢిల్లీ కి 3 AC అయితే 1500 నుండి 2000 Rs మధ్యలో ఉటుంది, స్లీపర్ అయితే 700 నుండి 1000 మధ్యలో ఉంటుంది సుమారు 30 గంటల ప్రయాణం ఉంటుంది . న్యూ ఢిల్లీ నుండి హరిద్వార్ కి 3అక్ అయితే 500 నుండి 600 Rs ఉంటుంది. స్లీపర్ అయితే 185 నుండి 250 మధ్యలో ఉంటుంది . ప్రయాణం 5 గంటలు ఉంటుంది . హరిద్వార్ నుండి అనేక బస్సులు , క్యాబ్ లు అందుబాటులో ఉంటాయి. హరిద్వార్ లో మన తెలుగువారిచే నడపడే గౌతమి నిత్య అన్నదాన సత్రం ఉంది అక్కడ ఉండటానికి ac , non ac గదులు దొరుకుతాయి,

ఏ వేళ లో వెళ్ళినా కడుపునిండా భోజనం పెడతారు, కేవలం మనం భోజనం చేయటం కాదు మనలాంటి మరికొంతమంది భక్తుల కడుపునింపేందుకు మనవంతు విరాళం మనకిష్టమైన వారి లేదా మన కుటుంబ సభ్యుల యొక్క పుట్టినరోజు, పెళ్లిరోజు లేదా వారి అబ్దికం మొదలైన సందర్భాలకు అన్నదానానికి విరాళం కూడా ఇవ్వవచ్చు

గౌతమి నిత్యాన్నదాన సత్రం వారి వీడియో లింక్ కింద ఇస్తున్నాను చూడండి

https://www.instagram.com/reel/C7ONa_Iuo9D/?igsh=d3FxbHE5ZGUzcTJk

మన ప్రోగ్రాం నీ బట్టి వెళ్ళేప్పుడు లేదా రిటర్న్ లో వచ్చేప్పుడు అయినా హరిద్వార్ లో ఒక రెండు రోజులు ఉండే విధంగా ప్లాన్ చేసుకుని మొదటిరోజు సాయంత్రం 5.30 కి హరి కి పౌడి అనే ఘాట్ వద్ద జరిగే గంగా హారతి నీ తప్పని సరిగా చూడండి, అదొక అద్భుతమైన అనుభూతి. ఆ తర్వాత అక్కడ ఉన్న అమ్మవారి గుడులు ఇతర దర్శనీయ స్థలాలు చూసుకుని అక్కడినుండి కేదార్నాథ్ లేదా బద్రినాథ్ ప్రయాణం ఆరంభించవచ్చు.

హరిద్వార్ నుండి ప్రయాణం ఎలా ఉంటుంది అన్నది next blog లో ఇస్తాను తప్పకుండా చదవండి, మరో నలుగురికి షేర్ చేయండి.

సశేషం

జై గురుదేవా