అరుణాచల క్షేత్ర దర్శనం Arunacahalam visit

జై గురుదేవ

అరుణాచలం అనే పేరు తలచుకున్నా చాలు పాప రాసి ద్వంసమైపోతుంది, అందులోనూ కార్తీకమాసం లో అరుణాచలాన్ని, ఆ అరుణాచలేశ్వరుడు నీ స్మరించడం దర్శించటం వలన అనేక జన్మల పాపాలు హరిస్తాయి, ముక్తి కలుగుతుంది అని పెద్దల మాట.

ఈ పవిత్ర కార్తీకమాసం లో అరుణాచలానికి సంబంధించి నాకు తెలిసిన విషయాలు మీకు తెలియజేయగలగటం నా అదృష్టం.

మా గురువుగారి దయవల్ల, అరుణాచలేశ్వరుని కృప వలన మేము మూడు సార్లు అరుణాచల క్షేత్రానికి వెళ్ళడం జరిగింది. రెండుసార్లు గిరిప్రదక్షిణ చేయగలిగాము. అక్కడ మేము బస చేసిన సత్రం వివరాలు, అక్కడి విశేషాలు కొన్ని అయినా తెలియజేయడానికి ప్రయత్నిస్తాను.

• అరుణాచలం, పంచభూత లింగాలలో అగ్నిలింగం కొలువై ఉన్న క్షేత్రం.

• మీరు గర్భగుడిలోకి దర్శనానికి వెళ్ళినప్పుడు లోపల స్వామి దగ్గర అసాధారణమైన వేడిని తప్పకుండా గమనించండి.

• స్వామి వారి ఆలయంలో రమణులు తపస్సు చేసుకున్న పాతాళ లింగాన్ని ఆ ప్రదేశాన్ని తప్పకుండా చూడండి. అక్కడ కూర్చుని కాసేపు ధ్యానం చేసుకోండి.

పాతాళ లింగం

• గుడిలో ప్రతి స్థలానికి ప్రతి గోపురానికి గొప్ప చరిత్ర ఉంది నండూరి శ్రీనివాస్ గారు చేసిన వీడియో చూసి వెళితే ఇంకా చక్కగా దర్శనం చేసుకోవచ్చు.

• స్వామి వారి దర్శనం తర్వాత హడావిడిగా బయటకు వచేయకుండా లోపల కనీసం ఒక గంట సేపు మౌనంగా కూర్చొని అక్కడ స్వామి వారి అస్తిత్వాన్ని అనుభూతి చెందండి.

• స్వామి వారి గర్భాలయ గోపురం వెనకనుండి అరుణాచలం కొండ నీ చూడటం మిస్ అవ్వకండి.

• అరుణాచలం లో గర్భగుడిలో ఉన్న మూర్తి కన్నా కొండ నీ పరమేశ్వరునిగా భావిస్తారు. పరమేశ్వరుడే కొండగా వెలిశాడు. కనుక గిరి ప్రదక్షిణ చేయడం తప్పనిసరిగా భావించండి

• భగవాన్ రమణులు చెప్పిన విధంగా గిరిప్రదక్షిణ అనేది ఒక 9 నెలల నిండు గర్భిణీ ఏ విధంగా నడుస్తుందో అదే విధంగా అంతా మెల్లిగా నడుస్తూ వేసే ప్రతి అడుగులో అరుణాచల శివ అరుణాచల శివ స్మరిస్తూ అడుగు అడుగునా ఆ గిరి రూపంలో ఉన్న స్వామిని దర్శిస్తూ ఆ ప్రకృతిలో మమేకమయ్యి ప్రదక్షిణ చేయండి.

• మొత్తం 16 నుండి 17 కిలోమీటర్లు ఉంటుంది కనుక పట్టపగలు చెప్పులు లేకుండా ఎండలో చేయటం చాలా కష్టం, కనుక, సాయంత్రం, లేదా రాత్రి లేదా బాగా తెల్లవారుజామున ప్రదక్షిణ మొదలుపెట్టుకునేలా ప్లాన్ చేసుకోండి.

• ప్రదక్షిణ లో అష్టదిక్కుల్లో లింగాలు ఉంటాయి దర్శించి ప్రతి లింగం నుండి గిరి దర్శనం చేస్తూ ముందుకు కదలండి.

• ఫోన్ మాట్లాడుతూ, తోటి వారితో ముచ్చట్లు వేస్తూ ప్రదక్షిణ చేస్తే దాని ఫలితం ఉండదు, పరమేశ్వరుని నామస్మరణ లో మాత్రమే చేయాలి.

• అక్కడ సాధువులకి మీకు చేతనైనంత లో దానం చేయండి.

• శివ సదనం, శివ రమణ అని సత్రాలు ఉంటాయి కార్తీకమాసం, మార్గశిరం లో కాకుండా మిగిలినప్పుడు రూమ్స్ దొరుకుతాయి. పరవడి రోజుల్లో మాత్రం dormetories దొరుకుతాయి.

• ఇంకో ముఖ్య విషయం అక్కడ ఉచిత భోజనం చాలా రుచికరంగా పెడతారు. ఫ్రీ గా తినేసి వెళ్లకుండా అన్నదాన కార్యక్రమం నడిచేందుకు తోచినంత డబ్బు మీకు ఇష్టమైన వారి పుట్టినరోజులు లేదా పెద్దల పేరున ఇవ్వండి.

• రమణ మహర్షి ఆశ్రమం తప్పకుండా దర్శించండి

• అక్కడ లైబ్రరీ లో సూరినాగమ్మ గారి జీవిత చరిత్ర, రమణాశ్రమ లేఖలు ఈ రెండు పుస్తకాలు తప్పకుండా కొనుక్కోండి.

• భాగవాన్ రమణులు పరమపదించిన గది తప్పకుండా చూడండి అక్కడ ఆయన పరమపదించిన సమయానికి గోడ గడియారం ఆగిపోయింది. రమణులు వాడిన ప్రతి వస్తువును చాలా భద్రంగా భద్రపరిచారు.

• రమణాశ్రమం నుండి పైకి గిరి పైకి వెళ్లి స్కంద గుహ, విరూపాక్ష గుహ తప్పకుండా దర్శించండి, కాసేపు అక్కడ ధ్యానం చేసుకునేలా ప్లాన్ చేసుకుని వెళ్ళండి.

• నడవలేని వారు ఆటో లో ప్రదక్షిణ చేస్తూ మధ్యలో లింగాలు దర్శించుకుంటూ వెళ్ళవచ్చు.

• ఆది అరుణాచలం ఆలయం దర్శించండి.

• కొండ ఎక్కేటప్పుడు దిగేటప్పుడు చెత్త వేయకుండా ఉండండి.

అరుణాచలం దర్శనం మీ అందరికీ కలగాలని కోరుకుంటూ...

ధన్యవాదాలు.